Â鶹Éç

Cafwyd yr agoriad delfrydol i ben blwydd Aberaeron ddydd Sadwrn wrth i'r haul dywynnu'n braf dros y dathliadau ger yr harbwr.

Cychwynnodd yr wythnos o ddathliadau â diwrnod liwgar i goffau treftadaeth forwrol yr ardal. Roedd yna arddangosfeydd amrywiol i'w canfod ger y clwb hwylio, gan gynnwys arddangosfa yn dangos sut oedd mynd ati i greu cewyll a rhwydi i ddal gorgimychiaid!

Roedd yna stondinau amrywiol yn gwerthu pob math o bethau, gan gynnwys gwaith celf gan artistiaid lleol, hen drugareddau morwrol yn dyddio o'r ddeunawfed ganrif, a chynnyrch o winllan Ffynnon Las ger Aberaeron.

Roedd y tywydd braf ag awel y môr yn magu digon o syched a chwant bwyd ymhlith yr ymwelwyr. Wrth lwc roedd yna stondin yn gwerthu seidr cartref wrth law, ac Owain y cigydd lleol yn gwerthu ei selsig arbennig i goffau'r deucanmlwyddiant!

Gyda'r nos fe drodd y tywydd am y gwaethaf a bu i'r dref dystio'r cawodydd rhyfedda. Serch hynny nid oedd hynny yn ddigon i dorri ysbryd a brwdfrydedd y bobol leol a'r llu o ymwelwyr oedd wedi ymgynnull yn y dre.

Glaw neu hindda roedd miloedd yn sefyll ar hyd wal yr harbwr erbyn wyth o'r gloch i wylio arddangosfa yr RNLA. Roedd yn gyfle i bobol bae Ceredigion gael dangos ei gwerthfawrogiad i'r rhai hynny sy'n gwneud cymaint o waith clodwiw yn amddiffyn ac yn achub morwyr a chychod mewn tymestl.

Wrth iddi nosi fe oleuodd yr harbwr. Roedd y clwb hwylio wedi gwisgo cychod yr harbwr ar ffurf noson Fenisaidd. Roedd y lle yn gasgliad o olau gwyrdd, glas a gwyn yn dawnsio ac yn adlewyrchu ar hyd wyneb y dŵr, a'r dorf wrth eu bodd.

Toc cyn unarddeg y nos cafwyd yr arddangosfa dân gwyllt fwyaf drawiadol a dystiwyd erioed o'r blaen yn y dref, yn fy marn i. Am chwarter awr di-dor goleuodd yr awyr yn gybolfa o liwiau amrywiol, ac fe swynwyd y dorf gan arddangosfa broffesiynol a gododd calonnau pob un wrth i'r glaw bistyllu yn ddidrugaredd i lawr.

Dyma beth oedd agoriad rhagorol a delfrydol i wythnos sy'n argoeli bod yn dipyn o ddathliad pen-blwydd!

Tomos Dafydd