|
Ond gyda Tsiena yn paratoi i groesawu'r byd i Beijing ymhen saith wythnos, mae'r nofiwr ifanc o'r Barri yn dawel hyderus o greu argraff yng Ngemau Olympaidd 2008.
Cyfweliad gyda David Davies
"Dw i wedi bod yn ymarfer yn galed ac mae pob dim wedi mynd yn dda iawn a bellach dw i'n edrych ymlaen yn fawr at yr achlysur," meddai mewn cyfweliad gyda Â鶹Éç Cymru.
Go brin fod y gair 'ymarfer' yn cyfleu gwir natur yr her gorfforol feunyddiol y mae Davies yn dewis wynebu.
Er mwyn cystadlu gyda'r goreuon yn ei gamp mae'r gŵr 23 mlwydd oed yn nofio o leiaf 80,000m, neu 50 milltir yr wythnos.
Fe ŵyr Davies fod ymroddiad o'r fath yn angenrheidiol os ydi o am wella ar y fedal efydd enillodd yn y ras 1500m yng Ngemau Olympaidd Athen yn 2004.
"Fe fydd hi'n anodd iawn hyd yn oed i gyrraedd y ffeinal, ond dwi'n hoffi'r her o gystadlu yn y rasys mawr," meddai Davies.
Yn ogystal ar ras1500m mae Davies hefyd wedi penderfynnu cystadlu yn y ras dwr agored dros 10k sydd yn gamp newydd yn y Gemau eleni.
Mae'r ras yn cael ei gynnal mewn llyn yn yr awyr agored yn hytrach na phwll traddodiadol ac ar ôl gorffen yn ail ym Mhencampwriaeth y Byd yn Seville yn gynharach eleni, mae Davies yn edrych ymlaen at yr her newydd.
"Dwi'n ystyried ar y ras 10k fel bonws i ddweud y gwir, dyw e ddim yn effeithio ar fy ngwaith paratoi ar gyfer y 1500 felly mae modd gwneud y ddau."
Yn anffodus efallai, er mwyn gwireddu ei uchelgais yn Beijing, mae Davies wedi penderfynu symud o Gaerdydd i Loughbrough er mwyn paratoi ar gyfer y gemau a hynny o dan adain ei hyfforddwr newydd Kevin Renshaw.
"Roedd hi'n anodd gadael Caerdydd ond mae Loughbrough yn cynnig mwy o stimulus.
"Mae mwy o gefnogaeth o ran gwyddoniaeth chwaraeon er mwyn gwella techneg yno, a hefyd dwi'n ymarfer gyda nofwyr eraill sy'n gobeithio cystadlu yn Beijing.
"Cyn codi yn y bore er mwyn ymarfer mae'n rhaid i chi fwynhau nofio, ac yn sicr dwi'n mwynhau fy hun ar hyn o bryd."
 |
Ìý