Â鶹Éç

Gellir ffurfio'r dyddiad 08-08-08 drwy ddefnyddio cylchoedd yn unig.

Yr wythnos hon dyma fydd diwrnod seremoni agoriadol y Gemau Olympaidd - sydd a'i logo, yn addas iawn, yn cynnwys pum cylch.

Bydd y seremoni ar 08-08-08 yn dechrau yn Beijing am wyth eiliad wedi wyth o'r gloch.

Am ryw reswm bydd y gystadleuaeth bêl-droed yn dechrau deuddydd cyn y seremoni agoriadol ond am yr wythnosau nesaf bydd sylw'r byd ar Beijing a'r digwyddiad mwyaf ym myd y campau.

Canolbwynt y sylw fydd Stadiwm athletau newydd y "Nyth Aderyn" sy'n drawiadol iawn yn bensaernïol.

Ond mae'n siŵr y bydd llawn gymaint o sylw ar wleidyddiaeth gyda hawliau dynol Tseina a chyflwr yr amgylchedd yn Beijing o dan y chwyddwydr.

Fyddai'r un Gemau Olympaidd yn gyflawn chwaith heb ambell stori am athletwyr yn cam-ddefnyddio cyffuriau.

Y gobaith yw mai'r campau fydd yn denu'r prif sylw gyda chystadleuwyr gorau'r byd yn brwydro am y medalau.

Yn eu plith bydd 12 o Gymry, gyda'r seiclwyr Nicole Cooke a Geraint Thomas, y nofiwr David Davies a'r rhwyfwyr Tom James a Tom Lucy ymhlith y rhai fydd yn obeithiol o ennill medal.

Oherwydd y gwahaniaeth amser bydd mwyafrif y cystadlu yn ystod oriau'r nos ond bydd gwasanaethau'r Â鶹Éç yn darparu uchafbwyntiau drwy gydol y dydd ar deledu, radio ac ar-lein.

Rhodri Llywelyn fydd yn gohebu ar ran Radio Cymru a Newyddion S4C yn Beijing.

Mae'n siŵr y bydd sawl un fodd bynnag yn cael eu temtio i godi'n gynnar neu i dreulio noson hwyr o flaen y teledu i wylio rhyw ras neu gêm arbennig dros yr wythnosau nesaf.

Mae'r Gemau Olympaidd yn cael eu cofio am ddigwyddiadau neu unigolion arbennig.

Kelly Holmes oedd seren Prydain ar y trac yn y gemau diwethaf yn Athen tra Cathy Freeman oedd arwres fawr Awstralia yn gemau Sydney.

Y tebygrwydd yw mai Usain Bolt fydd un o sêr y gemau yn Beijing, y gŵr sydd yn dal record 100m y byd ac a fydd hefyd yn cystadlu yn y 200m.

Bydd gobeithion y Tsieniaid ar ysgwyddau Liu Xiang, a enillodd y fedal aur yn Athen yn y ras 110m dros y clwydi.

Yn y pwll nofio mae rhai yn darogan y gallai'r Americanwr Michael Phelps dorri record Mark Spitz o saith medal aur mewn un Gemau Olympaidd.

Bydd rhai o enwau mwyaf cyfarwydd y byd chwaraeon yn cystadlu mewn campau fel tenis a phêl-droed tra bydd sawl enw anghyfarwydd hefyd yn siwr o hawlio'r penawdau mewn cystadlaethau amrywiol dros yr wythnosau nesaf.

Un fydd yn cael cryn sylw mae'n siwr fydd y deifiwr 14 oed o Loegr, Tom Daley.

Mae'n siwr mai magu profiad fydd ei brif nod ef yn Beijing ar gyfer Gemau'r dyfodol.

Wrth son am y dyfodol, os oeddech chi'n meddwl fod llawer o sylw yn y cyfryngau i'r Gemau Olympaidd dros yr wythnosau nesaf, dychmygwch beth fydd y sefyllfa ymhen pedair blynedd pan fydd Llundain yn gartref i'r Gemau!