Lluniau taith i'r Eidal"Dwi wedi helpu i drefnu Ras yr Wyddfa ers tua 30 mlynedd rŵan a thrwy'r ras honno, 'da ni fel pentref Llanberis wedi gefeillio efo tref yng ngogledd yr Eidal. Daeth rhedwyr o'r Eidal yma yn 1980, ac wedyn aethon ni atyn nhw flwyddyn wedyn a 'da ni wedi bod yn mynd yn ôl a 'mlaen ers hynny.
Ddaru'r ras yn yr Eidal efeillio efo Ras yr Wyddfa, yna ddaru Clwb Rhedeg Eryri efeillio efo Clwb Rhedeg Morbegno ac felly daeth y ddwy dref yn gyfeillion hefyd.
Dwi wedi bod draw i Morbegno dros ugain o weithiau. Mae'n dre fwy 'na Llanberis - tua maint Bangor - ond mae'n ddigon tebyg. Mae mewn dyffryn, gyda mynyddoedd o'i amgylch - jest fod popeth bum gwaith mwy - y boblogaeth, y dyffryn, y mynyddoedd!
Maen nhw wrth eu bodd yn dod drosodd, hyd yn oed i weld Andrea Bocelli yn y Faenol! Roeddent wedi eu syfrdanu efo beth oedd yn mynd ymlaen. Mae 'na rhywbeth elitaidd mewn cyngherddau opera yn yr Eidal, doedden nhw heb fod i ddigwyddiad awyr agored fel 'na o'r blaen.
Daeth band roc drosodd yn ddiweddar hefyd, a ddaru'r Gogz, neu'r Heights erbyn hyn, fynd draw yno. Dyna brofiad hollol wahanol i fynd draw i Morbegno efo'r rhedwyr! Maen nhw wastad yn poeni am fwyd ac am gael digon o gwsg a chael mynd i'r gwely'n gynnar ond doedd y band ddim yn poeni am hynny o gwbl!
Mae athrawon o Ysgol Llanbadarn am fynd draw cyn bo hir i weld sut mae pethau cyn ystyried mynd â phlant o'r ardal allan i Morbegno.
Mae'n bwysig pan mae ein cyfeillion yn dod draw nad ydym yn gwneud rhyw wledd o fwyd Eidalaidd fel ddaru tref gyfagos arall oedd wedi gefeillio efo tref yn yr Eidal. Mae'n bwysig peidio â gwneud pethau maen nhw wedi arfer â nhw - fyswn i ddim eisiau fish a chips yn yr Eidal! 'Da ni'n dangos sut mae bywyd fan hyn. Maen nhw'n dod draw ac yn aros mewn tai pobl o'r pentref - mae dau gwpwl wedi cael pobl draw ers 25 mlynedd!
Mae gwersi Eidaleg wedi cychwyn yn Llanberis rŵan, ond dwi wedi sylwi erbyn hyn mai ail iaith lot o bobl Morbegno yw Saesneg. Flynyddoedd yn ôl, Ffrangeg oedd ail iaith y rhan fwyaf o Eidalwyr ond mae pethau wedi newid."
Ìý
