|
Mae'r gêm Fight Night yn gêm focsio gan y cynhyrchwyr EA Games. Mae'r gêm ar gael ar gyfer Playstation 2 a'r XBOX, ac yn costio oddeutu £39.99. Bocsio, yn amlwg yw pwrpas y gêm hon. Fe allwch ddewis unrhyw focsiwr o 32 o focswyr trwyddedig (go wir), neu fe allwch greu bocsiwr eich hun. Gallwch gymryd rhan mewn gornestau yn erbyn bocswyr eraill, neu ymarfer i wella eich bocsiwr chi. Nodwedd newydd yn y gêm hon yw 'total punch control'. Dyma'r tro cyntaf i'r nodwedd yma gael ei ddefnyddio mewn gemau bocsio, ac mae'n gweithio yn effeithiol iawn. Mae'n eich galluogi i reoli yn union ble rydych yn anelu dyrnau eich bocsiwr. Mae graffeg y gêm yn wych, gyda'r bocswyr a'r stadiwm bocsio trwyddedig yn edrych yn union fel y maent go iawn. Mae'r sain yn wych hefyd, gyda chaneuon gan fandiau enwog gan gynnwys N.E.R.D. Fe all y gêm yma barhau am byth gan eich bod yn gallu cael gornest ar unrhyw adeg. Buaswn i'n bersonol yn marcio 9/10 i'r gêm hon. Os ydych yn hoffi bocsio, yna mae'r gêm hon yn angenrheidiol i chi!
 |
