 |
 Frizbee, Brigyn...
Rhyng-gol 2004
Alun Rhys Chivers
Lle a phryd
Gig Ryng-gol Prifysgol Cymru Aberystwyth, Mawrth 5ed, 2004
Y bandiau
Frizbee, Brigyn, Radio Luxembourg
Awyrgylch
Roedd y lle'n llawn ar gyfer uchafbwynt calendr cymdeithasol Prifysgol Cymru, gyda disgwyliadau'n uchel am noson gofiadwy. Cynheswyd y dorf gan seiniau 'Radio Luxembourg' - roedd digon o fynd ynddyn nhw ac yn y dorf mewn ychydig iawn o amser. Pan ddaeth 'Brigyn' ymlaen, fe aeth pawb yn wyllt gan ganu i bob un gân - roedd y swn yn fyddarol! Roedd yn anodd peidio symud i'w seiniau nhw. Cyrhaeddwyd uchafbwynt gydag ymddangosiad 'Frizbee' i'r llwyfan. Aeth y dorf yn hollol wyllt wrth i'r band daro nodyn cyntaf 'Blew'. Rociodd y dorf go iawn!
Trac y noson
'Lleisiau yn y Gwynt' gan 'Brigyn'. Roedd yr awyrgylch yn drydanol. Dwi'n siwr nad fi oedd yr unig un i deimlo ias wrth glywed y trac hwn. Hollol wefreiddiol!
Disgrifiwch y perfformiadau
Mae 'Radio Luxembourg', band ifanc o Aberystwyth yn gwella gydag amser. Roc a rôl a gafwyd ganddyn nhw trwy gydol eu set. Roedd y dorf yn dawnsio i 'Pwer y Fflwer', 'Pobl y Piws' a'r encôr, 'Pacio Rhai Gwers'. Mae hanner y band yn gyn-aelodau o 'Mozz' ac roedd eu holion i'w gweld arnyn nhw.Daeth bois 'Epitaff', Eurig ac Ynyr nol dan eu hail enw, 'Brigyn', ac mae'n nhw'n profi i fod yr un mor boblogaidd ag erioed. Seiniau Celtaidd sydd i'r rhan fwyaf o'u caneuon - y mwyafrif yn faledi. Maen nhw'n eitha' gwerinol, gyda'u cymysgedd o gitarau ac allweddellau. Fe gawson nhw'r gorau allan o'u cynulleidfa!Wrth i 'Frizbee' daro nodyn cyntaf 'Blew', roedd hi'n argoeli i fod yn set i'w fwynhau. Daeth y bois o Flaenau Ffestiniog i'r llwyfan gan ddangos eu bod nhw'n haeddu bod yn brif fand y noson. Erbyn hyn, maen nhw'n enillwyr dwbl yng Ngwobrau RAP Radio Cymru ac yn un o fandiau mwyaf llwyddiannus y flwyddyn. Roedd eu set yn gymysgedd o ganeuon 'Hirnos' a 'Lennonogiaeth' - cawson ni faledi a chaneuon roc wedi'u plethu'n effeithiol. Roedd hi'n anodd peidio dawnsio iddyn nhw! Cafwyd y dorf yn galw am ragor erbyn diwedd y set, a daeth y bois i'r llwyfan eto i orffen gyda 'Da Ni Nol' (ffefryn personol gen i!). Roedd pawb yn bopio i hon! Roedd cyfeiliant gitâr Ywain i'r anthem yn wych - diweddglo perffaith i noson berffaith!
Uchafbwynt y noson
Yn ddi-os, fersiwn unigryw Ywain Gwynedd Frizbee o'r anthem genedlaethol. Roedd hi'n ddiweddglo addas iawn ar gyfer noson wych!
Y peth gwaethaf am y noson
Roedd hi'n siomedig fod 'Brigyn' wedi cael gymaint o broblemau technegol ar ddechrau'r set, ond fe ddaethon nhw drwyddi gyda pherfformiad gwych!
Achlysur Roc a Rôl
Bois 'Frizbee' yn rhoi llofnodion ar ddiwedd y noson y tu cefn i'r llwyfan i fyfyrwyr benywaidd golygus - i'w rhoi i'w rhieni!!!
Beth sy'n aros yn y cof?
Sylweddoliad Ywain Gwynedd ar ôl y gig bod 'Frizbee' wedi sefydlu eu hunain yn gadarn ar y sîn a'u bod nhw yma i aros!
Talent gorau'r noson
Mae'n anodd gwahaniaethu rhwng y bandiau - cafwyd perfformiad gwych gan bob un! Yn bersonol, rhaid dweud 'mod i'n ffan enfawr o 'Frizbee' (mae'n nhw 'di mynd o nerth i nerth yn gyflym iawn!).
Marciau allan o ddeg
10
Un gair am y gig
Rhyng-gol Rhagorol (ocê, dau air!!)
Unrhyw sylwadau eraill? Cynghorion? Rhybuddion?
Mae gigs y ryng-gol yn Aber yn wych - manteisiwch ar y cyfle i fynd i'r un nesa', da chi!
|
|
Amserlen C2:
Cysylltiadau, artistiaid, bandiau...