Â鶹Éç

Enw'r adolygydd
Gethin Wyn Jones

Awyrgylch
Awyrgylch gwych i'r gig gyda 65,000 o bobl o dan do y stadiwm erbyn diwedd y noson. Pobl o bob oedran yno i fwynhau y wledd o gerddoriaeth gan gynnwys fi a fy ffrindiau Sara, Daf a Iwan.

Disgrifiwch y perfformiadau

Yeti: Band ifanc newydd oedd â chaneuon gwledig, swynol, gyda rythm cyflym a chyson ymhob cân. Band agoriadol da.

Nick Armstrong & The Thieves: Eithaf tebyg oedd y band yma i Yeti, gyda chaneuon acwstig a symudiad sydyn iddynt. Prif leisydd egniol iawn a'r band yn llawn hyder gyda chaneuon reit 'catchy' yn aros yn y cof.

The Subways: Gwych! Roedd y band yma yn llawn egni gyda bas-wraig hollol nyts! Dyma oedd eu gig gyntaf mewn stadiwm a hefyd o flaen cynulleidfa fawr. Yn amlwg ddaru nhw fwynhau y cyfle ac roedd ymateb y gynulleidfa iddynt yn un da. Caneuon reit trwm oedd gan y band, ond roedd eraill yn rhai swynol fel eu sengl newydd 'No Goodbyes'.

The Coral: Perfformiad reit dda gan The Coral gyda eu prif caneuon 'Dreaming Of You' a 'In The Morning' yn sefyll allan. Ond roedd llawer o'u traciau yn rhai oddi ar ei albyms a teimlais nad oedd digon o bobl yn adnabod y traciau. Ar y cyfan roedd eu perfformiad yn un da iawn gyda phawb wedi mwynahu eu clywed.

Razorlight: Dyma ble ddaru y noson cicio off yn iawn! Roedd Johnny Borrell yn wych wrth gael y gynulleidfa i gyd-ganu. Roedd 'Golden Touch' a 'Somewhere Else' yn sefyll allan gyda phawb yn canu pob gair ac yn mwynhau eu set. Johnny Borrel amlwg wrth ei fodd wrth neidio dros yr amps ac at y dyrfa yn y tu blaen. Roedd yna uffar o dwrw gan y mwyafrif o enethod yn y stadiwm hefyd pam dynodd ei grys i ffwrdd!!

The Foo Fighters: Dyma ni sŵn! Roedd Dave Grohl yn wych yn gael pawb yn nyts ac yn sgrechian eu penau i ffwrdd! Roedd 'All My Life', 'Best Of You' a 'DOA' i gyd yn cael eu perfformio i safon wych ac roedd Dave Grohl gyda chysylltiad da â thorf mor fawr. Roedd y goleuo yn y set yma yn reit wych a sain ofnadwy o dda am gymaint o dwrw! Hwn oedd y set mwya' roc a rôl o'r noson gyda phawb yn amlwg wedi ei fwynhau.

Oasis: Prif band y noson a bron iawn pawb yn y stadiwm yn ysu i'w gweld! Roedd eu set yn wych gyda chymysgedd o'r clasuron a'r rhai newydd. Roedd pawb wrth eu boddau yn gweld y band yn torri fewn i ganeuon fel 'Morning Glory', 'Wonderwall' a 'Champagne Supernova'. Roedd eu llwyfan wedi'w amgylchynu gan oleuadau gwyn ac roedd yna deimlad bod pob person yn y stadiwm yn medru cysylltu â'r band.

Roedd eu diweddglo yn wych gyda phawb yn canu 'Don't look back in anger' gyda'i gilydd, a'r band yn gorffan gyda 'cover' dda o 'My Generation' gan The Who. Perfformiad gwych gan Noel a'r hogia ac yn cloi noson llwyddiannus iawn o gerddoriaeth.

Trac y noson
'Don't look Back In Anger' gan Oasis. Mae clywed pob llais yn y stadiwm yn canu y gytgan i'r gân yma dros Noel Gallagher yn fythgofiadwy, ac roedd Noel ei hun yn falch o'r ymateb gyda gwen enfawr ar draws ei wyneb ar ddiwedd y gân.

Uchafbwynt y noson
Oasis, Oasis, Oasis! Cael eu clywed yn fyw am y tro cyntaf yn wych!

Y peth gwaethaf am y noson
Ceisio gael tacsi allan o Gaerdydd am hannar nos ar ôl i 65,000 o bobl adael y stadiwm!

Achlysur Roc a Rôl
Dave Grohl o'r Foo Fighters a'i ail gitarydd yn cael math o 'battle' gitars. Un yn ceisio fod yn well na'r llall a'r drymar yn ceisio fod yn well na'r ddau ohona nhw. Uffar o solos a riffs nyts gan y ddau am tua deg munud go dda.

Beth sy'n aros yn y cof?
Y gig i gyd, gymaint o fandiau anhygoel mewn un noson, mewn un lle, a phawb yn canu y geiriau i bob cân oedd yn cael ei chwarae.

Talent gorau'r noson
The Subways rhaid dweud. Potensial mawr iawn gan y band a set o ganeuon gwych.

Marciau allan o ddeg
9/10

Un gair am y gig
Anhygoel!

Unrhyw sylwadau eraill? Cynghorion? Rhybuddion?
Mae hi medru mynd yn oer mewn gigs yn y stadiwm, cofiwch lapio i fyny! A cyngor i chi, ewch i weld The Subways, ma nhw'n wych.

Lincs gwefan

Nid yw'r Â鶹Éç yn gyfrifol am unrhyw wefan allanol y cysylltir iddi o'r tudalennau yma.