Â鶹Éç

Am bàrd ag innse cò bh' ann an Catrìona Mhòr

Bha cothrom aig daoine tha mi smaoineachadh aig an àm sin a bhith diofraichte bho chèile, a bhith aocoltach ri chèile. Tha e mar gum biodh sinn a-nise ag iarraidh air daoine a bhith a' fàs nas coltaiche is nas coltaiche ri chèile - nar n-aodach, nar cainnt, is nar dòighean smaoineachaidh - anns a h-uile dòigh. Ach bha daoine tha mi smaoineachadh aig an àm sin, a' leantainn an nàdair fhèin gu math na bu dlùithe na tha sinn a' leigeil leotha an-diugh.

'S deagh chaomh leam a bhith a' cuimhneachadh air Catrìona Mhòr. Bha dithis pheathraichean ann, Murdag Mhòr is Catrìona Mhòr. 'S ann ri Murdag a bha a' glanadh na sgoile an urra ann am Pabail agus mar sin, 's gann gu robh latha dhen t-seachdain nach robh mi ga faicinn aig ceann air choreigin dhen latha, agus ga cluinntinn. Agus bha gu leòr aice ri ràdh. Ach cha robh uiread aice ri ràdh is a bh' aig Catrìona. B' i Catrìona a bu shine agus ged a bha iad nan dithis uaireigin a' dol chun an iasgaich air feadh na dùthcha, bha Catrìona Mhòr air sin a leigeil seachad. Bha i air fàs sultmhor agus mòr na corp is cha robh e furasta dhith idir dealachadh ro mhòr bhon teaghlach aice fhèin.

Ach mar is minig a tha a' tachairt nuair a tha bacadh dhen t-seòrsa sin air duine, thathar a' cur rud an àite an rud a tha air a thoirt bhuaidhe agus bha chuimhne aig Catrìona Mhòr a bha làidir agus bha liut anabarrach math aice air facail a chleachdadh. Bha i geur agus cha robh dragh aice dè chanadh i mu dheidhinn dhaoine. Cha robh dragh aice dè shaoileadh iad dhith. Agus bha sin gu math fallain. Tha cuimhne agam corra uair a bhith a' tighinn dhachaigh agus ag innse dham athair 's dha mo mhàthair pàirt de na rudan a bha Catrìona Mhòr ag ràdh rium is mi nam ghille beag, 's dòcha deich bliadhna. Agus mar a tha tachairt corra uair dhomh fhèin an-diugh, tha mi creidsinn gu robh iad air an uabhasachadh leis na rudan a bha mi a' cluinntinn aice.

Ach co-dhiù 's fheàrr dhomh dòcha tilleadh... A' bhàrdachd a tha seo, Air Leabaidh Bhochd, thàinig i thugam mar gum biodh, air feasgar no oidhche is sinn a' fuireach ann am Bute Gardens an Glaschu 's tha greis mhath bhuaithe. Chuir mi a' bhàrdachd ri chèile agus b' ann cola-deug às dèidh sin a chuala mi gun do chaochail Catrìona Mhòr dìreach mun àm sin. Chan urrainn dhomh a bhith cinnteach an ann air an dearbh fheasgar sin, no an dearbh latha sin ach b' ann glè fhaisg air an àm sin a chaochail i. 'S ann mu dheidhinn bàs Catriona Mhòir a tha a' bhàrdachd.