Â鶹Éç

Sheas a' mhàthair am bròn bàite
Aig Crann-ceusaidh deurach, cràidhteach
Am bun a Mic 's E 'n spàirn ro ghoirt.

Cridhe caomh bha brùite, dubhach,
Briste 'g osnaich 's a' tuireadh -
Rinn an claidheamh-guin a lot.

Ochòin! bu chràidhteach is bu chianail
Moire Mhàthair bheannaicht' Chrìosda
'S E ga phianadh air a' Chrois.

Gum bu dubhach, air a lèireadh
A bha Moir' air dhi bhith lèirsinn
Dìol ro dhèisneach h-aona Mhic.

Cò an neach a bhiodh san làthair
Chitheadh Màthair Dhè san spàirn sin
Nach biodh cràidhteach sileadh dheur?

Cò a b' urrainn gun bhith brònach
Smaoineachadh air cor na h-Ã’ighe
Ghabh co-phàirt an dòrainn Chrìosd?

Airson peacannan a shluaigh fhèin
Moire faicinn Ios' ga chiùrradh,
An dèis a sgiùrsadh cruaidh gun iochd;

Moire faicinn a Mic gràdhaich
Air a dhìobairt le chaomh-chàirdean,
Dol gu bàs air fiodh na Crois.

Mhàthair uile-ghaolach, tiùbhraich
Meud do dhòrainn orms' a dhrùidheadh
Los bhith bròn 's a' tùirse leat;

Deònaich m' anam le gaol Chrìosda
Bhith na lasair dhèin gun diocladh,
Chor 's gun toill mi mhiadh 's a thlachd.

Mhàthair naomh, biodh lotan creuchdach
Do Mhic ÃŒosa chaidh a cheusadh
Domhain geàrrt' air clàr mo chridh';

Deònaich hòmhsa, Mhoire Mhàthair,
Mo cho-roinn de Phàis mo Shlànair
Dh'fhuiling air mo sgàth gach nì.

Thugas dhomh gum bi mi tuilleadh
A' co-bhròn leats' mar as cubhaidh
Thaobh na dh'fhuiling do Mhac rùin;

A bhith ad chuideachd taobh 'Chruinn-cheusaidh
Is co-chòir ded dhòrainn fhaotainn,
Chuir mi, Mhàthair Dhè, nam ùidh.

Òigh ro urramach nan òighean, -
Na cuir suarach mi, ach deònaich
Dhomh co-chòir ded dhòrainn chràidh;

Deònaich gur e bàs m' Fhir-shaoraidh,
Is a Phàis 's a chreuchdan craobhach,
As culaidh-smaoinich dhomh gach tràth.

Gun dèan gaol nan lot mo reubadh
'S gaol na Fala, gaol 'Chruinn-cheusaidh,
M'anam thoirt fo ghèill 's fo dhaors';

Nuair a thèid mi 'n làthair Chrìosda,
Thoirt dhà cunntais air mo ghnìomhan,
Cùm bhon teine shìor mi saor.

Shlànair naoimh, an uair as bàs dhomh,
Builich orm air ghaol do Mhàthar
Ann am Pàrras crùn na buaidh;

Nuair a bhios mo chorp gun anail,
Deònaich sòlas sìor dham anam
Ann an glòir nam Flathas shuas'. Amen.