Â鶹Éç

Coinneach Moireasdan

Rugadh Coinneach Moireasdan, Coinneach Ailig Mhurdsaidh ann an Tolastadh bho Thuath air 28 Lùnasdal, 1941. Bha triùir pheathraichean aige, Màiri ann an Aimearagaidh, Ina ann an Tolastadh bho Thuath agus Seonag ann an Dùn Èideann. Cha robh Coinneach ach na leanabh nuair a chaidh athair a chall nuair a chaidh am bàta air an robh e fodha aig àm a chogaidh.

Bha a mhàthair, Màiri, beò gu aois mhòr agus gu dearbha bha i ag obair gus an robh i ceithir fichead sa ceithir. Bhiodh i ri cosnadh fad a' gheamhraidh a' dèanamh obair-taighe do dh'fheadhainn a bhuineadh do theaghlach Donaldson aig an robh an companaidhean bhàtaichean.

Chaidh Coinneach gu Bun-sgoil Tholastaidh agus do Sgoil MhicNeacail. Aon uair 's gu robh a làithean-sgoile air a chùl chaidh e a dh'obair do chompanaidh àrachais ann an Dùn Èideann mus do ghluais e do Ghlaschu a dh'obair dhan Abbey National.

Chaidh e an uair sin a dh'Inbhir Nis a dh'obair dhan aon chompanaidh airson sia bliadhna mus do thill e a Ghlaschu mu 1978.

Bha dithis gu sònraichte a thug brosnachadh dhà agus a mhisnich e gu seinn. B' iadsan Aonghas MacLeòid, an seinneadair Scalpach, agus Donnchadh MacLeòid à Rànais, a bha a' fuireach ann an Inbhir Nis, agus a bha aig aon àm ag obair dhan Chomunn Ghàidhealaich.

Chaidh Coinneach dhachaigh à Glaschu a chuideachadh a mhàthair ag ùrachadh an taighe ann an Tolastadh. Bha e ag obair an lùib a' chompanaidh Nationwide, ann a' Steòrnabhagh.

Phòs Coinneach agus Ceitidh NicDhòmhnaill, à Circebost, am Beàrnaraigh Leòdhais. Bhuail euslainte e gu math sgiobalta, gun mòran rabhaidh, agus chaochail e air 9 Ògmhios, 2000, dìreach sia mìosan an dèidh bàs a mhàthair.