Â鶹Éç

Mae Braehmer, 32, wedi cael gorchymyn gan y WBO i ymladd Cleverly nesaf, neu bydd ei goron yn cael ei chymryd oddi arno ac yn mynd i ddwylo'r Cymro.

Dywedodd Cleverly bod trafodaethau eisoes wedi cychwyn er mwyn ceisio cytuno ar ddyddiad, ac mae'n bosib y bydd y ddau yn cwrdd o fewn y ddeufis nesaf.

"'Dw i'n edrych ymlaen yn eiddgar ac mae'n rhaid i mi fod yn barod yn gorfforol ac yn feddyliol," meddai Cleverly, sy'n 23 mlwydd oed.

"Mae'r paratoadau wedi cychwyn - yr unig beth nawr yw aros er mwyn cael cadarnhad bod yr ornest yn sicr yn mynd yn ei flaen."

Tynnodd Braehmer allan o ornest yn erbyn y pencampwr WBA Beibut Shumenov ar 8 Ionawr oherwydd salwch.

Nid yw'r Almaenwr wedi ymladd ers mis Mawrth y llynedd, ac mae ei ddyfodol yn y sgwâr wedi bod mewn amheuaeth ar ôl iddo gael ei ddedfrydu i 16 mis o garchar am ymosodiad treisgar.

Mae Braehmer yn apelio yn erbyn y penderfyniad yna, ac wedi cael caniatâd i barhau i ymladd wrth ddisgwyl am y broses gyfreithiol i gymryd ei chwrs.

Roedd Cleverly yn gobeithio cael ymladd enillydd yr ornest rhwng Braehmer a Shumenov yn hwyrach yn y flwyddyn, ond mae ei gyfle i wireddu ei freuddwyd o ennill coron byd wedi cyrraedd yn gynt na'r disgwyl.