|
Pedwerydd oedd yr Albanwr ar gychwyn y diwrnod ond neidiodd i fyny i'r ail safle ar ôl perfformiad gwych ar ei gyfle olaf i lawr y cwrs.
 Rhodri Llywelyn yn crynhoi digwyddiadau'r pedwerydd diwrnod o gystadlu yn Beijing
Dyma'r tro cyntaf i Brydain ennill medal yn y canŵio ers i Gareth Marriott ennill yr arian yn Barcelona yn 1992.
Daeth mwy o lwyddiant pan enillodd dîm Prydain fedal efydd yn y marchogaeth dros dridiau - sef cystadlu dressage, neidio a thraws gwlad.
Ac yn ddiweddarach ychwanegodd Tina Cooke efydd arall yn y gystadleuaeth unigol.
Mae breuddwyd Michael Phelps o ennill wyth medal aur dal yn fyw ar ôl i'r Americanwr ennill y 200m dull rhydd - gan sefydlu record byd newydd arall.
Torrodd Phelps ei record ei hun drwy orffen bron i ddwy eiliad o flaen Park Tae-hwan o Dde Corea mewn amser o un munud a 42.96 eiliad.
Mae'r Americanwr eisoes wedi ennill aur yn y ras gymysg unigol dros 400m ac yn y ras gyfnewid 400m dull rhydd. Fe fydd yn mynd am ei bedwaredd fedal aur ddydd Mercher yn y 200m dull pili-pala.
Gorffennodd y Prydeiniwr Robbie Renwick yn wythfed.
Sefydlodd Americanwr arall, Aaron Peirsol record byd wrth gipio'r fedal aur yn rownd derfynol y 100m dull cefn.
Yng nghystadleuaeth gymysg y badminton, mae Gail Emms a Nathan Robertson drwodd i rownd yr wyth olaf wedi buddugoliaeth yn erbyn Gao Ling a Zheng Bo o Tsiena.
Ond mae'r bocsiwr Joe Murray allan o'r gystadleuaeth pwysau bantam ar ôl colli gornest ddadleuol yn erbyn Gu Yu o Tsiena.
 |
Ìý