�鶹��

Cineálacha Caitheamh Aimsire - Gafa Le...

ailt29/05/2009

Seo cailín óg a bhfuil áit ar leith ag an snámh ina saol.  Is as Gaoth Dobhair í Aisling Ní Mhaolagáin, a thosaigh ag snámh agus í iontach óg. Nuair a bhí a hathair san ospidéal agus ailse air, chinn Aisling gur mhaith léi airgead a thiomsú don aonad ailse, le cuidiú lena hathair.  Rinne sí snámh urraithe agus bhailigh sí níos mó ná cúig mhíle euro.  Ar an drochuair, níor tháinig athair Aisling slán as an ailse, ach bhain Aisling feidhm as a caitheamh aimsire le cuidiú leis an ospidéal ina raibh sé agus le cuidiú le daoine eile a bhfuil ailse orthu.  Seo a scéal:

Eagraíonn Cumann na mBunscol scéim spóirt CLG do pháistí bunscoile. I measc imeachtaí na scéime seo, is féidir le foirne óga imirt ag leatham ag cluichí móra idirchontae sa chraobh.  Fuair Christopher Duggan ó Ghaoth Dobhair i gContae Dhún na nGall deis imirt i gceann de na cluichí seo agus geansaí a chontae féin a chaitheamh - sa ghearrthóg seo cuireann sé síos ar an eispéireas:

Is iomaí buachaill agus cailín a bhfuil an damhsa Gaelach mar chaitheamh aimsire aici nó aige ar fud na hÉireann - agus ní amháin in Éirinn ach ar fud na cruinne chomh maith. Cuid de na páistí seo, éiríonn siad as an damhsa agus iad óg. Ach tá cion ar leith ag roinnt daoine ar an damhsa agus leanann siad leo, ag damhsa, ag cleachtadh agus ag cur isteach ar na comórtais. Baineann cuid acu boinn, coirn agus duaiseanna, agus faigheann cuid acu áit i seó stáitse ar nós Riverdance nó Lord of the Dance. Téann cuid acu le múinteoireacht nó le moltóireacht le ceann den dá údarás atá i mbun an rince, An Chomhdháil Múinteoirí Rincí Gaelacha agus an Coimisiún le Rincí Gaelacha. Tá Eimhear Nig Uiginn ar dhuine de na rinceoirí paiseanta sin. Míníonn sí an grá atá aici don damhsa sa ghearrthóg seo:

Is iomaí duine a bhfuil dúil aige nó aici sa cheol, agus a bhfuil bua an cheoil aige nó aici.  Is iontach an caitheamh aimsire an ceol, agus do na daoine óga seo, is caitheamh aimsire é a mhairfidh ar feadh a saol:
Is aoibhinn le Ciara Ní Bhaoill bheith ag casadh ceoil ar na drumaí sa bhaile, nó ar an fheadóg mhór i mbanna ceoil máirseála.  Tig an dá stíl ceoil léi go furasta, agus ba mhaith léi a bheith ina ceoltóir gairmiúil.  Tríd an cheol buaileann sí le neart daoine eile agus le cairde nua a bhfuil an speis chéanna sa cheol acu, agus baineann sí sult as páirt a ghlacadh i gcomórtais, fiú mura mbaineann sí duais.  Éist lena scéal sa ghearrthóg seo:

Tá dúil sa cheol ag Áine McGeeney ó bhí sí ina girseach óg, agus is é an ceol traidisiúnta is fearr léi.  Seineann sí an fheadóg mhór, an fhidil agus an fheadóg stáin, agus nuair a ghlac sí páirt i gceardlann don fheadóg mhór bhí deis aici bualadh le Kevin Crawford ón ghrúpa traidisiúnta Lúnasa.  Tá suim ar leith aici i gceol Lúnasa ó shin, agus is minic a théann sí go coirmeacha ceoil an ghrúpa.  Bíonn sí ag teagasc an cheoil do pháistí óga freisin, agus tá rún aici staidéar a dhéanamh ar an cheol ar an ollscoil, ach ina dhiaidh sin ba mhaith léí an domhan a thaisteal mar cheoltóir gairmiúil.

Tá dúil an domhain ag Cónall Mac Fhloinn sa rac-cheol. Bíonn sé ag amhránaíocht agus ag seinm ar an ghiotár ina ghrúpa ‘Subtle Approach’.  Bíonn gigeanna ag an bhanna go rialta i dtithe tábhairne, ach mar gheall ar an obair scoile ní bhíonn na gasúir in ann ceol a chasadh chomh minic agus is mian leo.  Ceolann siad amhráin de chuid na mbannaí is fearr leo, bannaí a bhfuil dúil ag a lucht féachana iontu.  Ba bhreá le Cónall an deis a bheith aige gairm a dhéanamh den cheol.

I gcomparáid leis na cineálacha eile spóirt a chothaíonn an Cumann Lúthchleas Gael, ní imrítear an liathróid láimhe go forleathan. Bíodh sin mar atá, creideann lucht leanúna an spóirt go bhfuil sé ar cheann de na cineálacha spóirt is gaiste agus is mó scil sa tír. Bhíodh an cluiche á imirt amuigh faoin spéir in éadan balla na céadta bliain ó shin, ach is gnách é a imirt i gcúirt scuaise anois. Tá breis agus 170 club in Éirinn ach tá an cluiche le feiceáil fosta i Meicsiceo, i Meiriceá, san Astráil agus i dtíortha eile. Is í an liathróid láimhe an spórt is fearr le hAisling Ní Raghailligh, agus mholfadh sí do gach duine triail a bhaint as!

Baineann a lán daoine sult as an tseoltóireacht. Níl rud ar bith is mó a chuireann suaimhneas ar chroí an duine ná a bheith amuigh ar an uisce. Tá Barra Mac Giolla Bhuí ina chónaí i Rinn Mhic Giolla Rua agus tá an-dúil aige i seoltóireacht, mar a bhíonn ag a lán daoine a bhfuil cónaí orthu cois farraige nó cois locha.  Thosaigh sé a chur spéise sa spórt nuair a chuaigh sé amach a sheoladh le teaghlach a charad agus tá spéis aige sa tseoltóireacht ó shin. Caithfidh Cónall bheith aclaí, mar tá fuinneamh agus láidreacht coirp de dhíth ar an seoltóir. Ach nuair a bhíonn sé amuigh ag seoladh ar an uisce leis féin agus é ag amharc ar thírdhreach álainn Chontae an Dúin, is ansin a bhíonn sé ar a sháimhín só.