Â鶹Éç

O, 's mairg tha 'n diugh feadh garbhlaich
'S ri falbhan am measg fraoich;
Us gathan grèin gu h-òrbhuidh
A' dòrtadh air gach taobh.
Gum b'fheàrr a bhi air bàrr nan tonn
Air long nan cranna caol;
'S a' faicinn nan seòl ùra
Ri sùgradh anns a' ghaoith.

O, fhleasgaich òig, gur gòrach leam
Do chòmhradh anns an uair,
An fhraoch-bheinn ghorm ga samhlachadh
Ri gleanntan glas a' chuain;
'S gur tric a's adhbhar caoinidh leam
A h-aon dhan d' thug mi luaidh,
Bhi às mo shealladh fad air falbh
Air bharraibh garbh nan stuadh.

A rìbhinn òig dhan d' thug mi gaol
B' e bhith ri d' thaobh mo mhiann,
Bhon chiad là riamh thug mi dhut spèis
Bu tu mo reul 's mo ghrian,
Ach taobh ri taobh, a luaidh ri d' ghaol
Tha m' aigne 'g aomadh riamh,
Gu marcachd nan tonn dùbhghorm
A dh'aindeoin dùdlachd shian.

O, leam bu mhiann a bhith san luing,
'S an stiùir a bhith nam làimh
An uair bhios muir gu nualanach,
Na glinn 's na stuaghan àrd,
A' brùchdadh barra-gheal fo a sròin,
'S le crònan seach a sail;
I 'g èirigh eutrom air gach tonn,
Is fonn oirre ri gàir'.

I 'g èirigh eutrom air an t-snàmh
Mar eala bhàin 's a' chaol;
Gach sgòd aice a mach gu cheann,
'S gach seòl a' tarraing gaoith';
I falbh le cuinnein fiadhta
Thair tuinn a b' fhiadhaich gaoir,
Mar steud-each cruidheach, uaibhreach,
A thug mu chluasa 'n taod.

Is ged a bhrùchdadh gaothan oirnn
Le neart nam Faoilleach fuar,
Is toirm na bagairt' bàsmhoire
Bhi 'm bàirnich àrd nan stuagh,
Le marachd mhath is cùram
Gheibh an iùbhrach ghasd a' bhuaidh;
'S thig fearalachd is mòralachd
Ri linn na còmhstri cruaidh'.

'S an uair a thigeadh sìochaint,
'S a bhiodh grian a' deàrrsadh caoin;
Gum b' aotrom bhi le ceòl is sunnd
Cur siùil ri slatan caoil;
'S an uair a bhiomaid dìomhanach,
Mo dhriamlach thair a taobh,
Is mi gu h-ait a' seinn le fonn,
"Mo nighean donn mo ghaol."

"O, òigeir ùir, nach èisd thu rium,
Ged 's mòr do spèis don chuan,
Cha mhair an òige daonnan,
'S 'n uair thig an aois le gruaim,
Gur bochd an obair seann-duine
Bhi mach fo ghreann nan stuagh
Fo chathadh geal nam bòc-thonna
Tro 'n oidhche reòdhta fhuair."

"O, 's mairg ri dorchadas is stoirm,
Bhios air a' chladach leis
Na gàirdeanan bha làidir
Air fàillneachadh gun treis',
Taigh-solais air an fhuaradh,
Is gaoth as cruaidhe fead
Gan sparradh chùm an fhuathais
'S an long mun cuairt cha leig."

"O, ainnir dhonn, na sil do dheòir,
Mu bhròn nach tig a chaoidh.
Tha 'n Tì a' riaghladh air a' chuan,
Tha riaghladh cluaintean fraoich;
Is ged, a luaidh, a thriallas mi
Gu oirean cian an t-saoghail,
Le thoil-san thig mi sàbhailte
Gu broilleach blàth mo ghaoil.

"Is ged is goirt an dealachadh,
Bidh 'n coinneachadh d'a rèir,
'S ar cridheachan an dealas ùr
A' dlùthachadh ri chèil',
An gaol gun mheirg, gun fhàilneachadh
Ach mar a bha gun bheud;
Gach turas-cuain ga ùrachadh
A mhùirneag a' chùil rèidh."