Â鶹Éç

Thug mi sgrìob do Dhail Dimàirt
Thoirt mòin' à Asmaigearraidh nuas
Chuideachadh le sgiobadh Mhàiri,
Lìonadh làraidh, 's aig a' chruaich.

'S ann ri tionndadh aig an lùbadh
Dhearc mo shùil air cùis mo dhàin,
Dh'èirich m' fhalt is ghais mo ghlùinean,
Dh'fhalbh mo lùth, is chrith nam chnàmh.

'N t-uamhann a thug uam mo mhisneachd,
Famhair ann an ìslig bàis,
'S aig cho mòr 's a bha 'n ceann-crìche
Dh'fhàg iad sìnt' i air a' bhlàr.

Mu thigh Dhòdu ghabh mi bràighe,
'S ràinig mi gun dàil am cheum;
Leig mi m' uirsgeulan ri Màiri,
'S rinn i gàire ri mo sgeul.

"Amadain gun chonn gun stòladh,
Cha robh 'n còrr ri iarraidh ort,
'S gun an sin ach a' chruach mhòine
A rinn Tòmas dhan an Scot.

Tuaireapadh air làmhan luideach
Rinn an iorapais gun diù,
Cha do sheall iad tùr no tulchais
'S dh'fhàg iad luideach i co-dhiù.

'S ann le rùn gean-maith don caraid
Nach deach taisealadh na sròin,
Fàdan mòra pròiceach taise
Dh'fheumadh seacachadh gu leòr.

"'Ni sinn riaghan caol" thuirt Ailean,
Ged a bhiodh i fada sìnt',
Mar cuir gaoth is grian a tail i,
Cha tig srad aist' ann an Tìm."

Thàinig Alasdair le làraidh,
Cha b' ann sàmhach, ach na ghlòir,
Chualas èigheachd aig taigh Thàididh
Dol na dhràgan ris na seòid.

"Leudaichibh a-mach am beul aic'
Chlann a' riabhaich tha sibh ann,
Nach dean gnothaich ceart na ciallach,
Ach a' fiaradh 's ri cur càm."

Thug e an uair sin dhaibh na tòimhsean,
Trì ceum coise, 's thabair leud,
'S gann nach deach e as a losaid
Aig cho farsaing 's a bha sgiab.

Chaidh Cairistìona bhochd air mhiapadh
'S beag an t-iongnadh 's mar a bha,
'N dreamaisg ud le chasan sgapte,
'S e ri siamaich na chùis-ghràin.

Cha b' ann snasail dh'fhàs an còrr dhith,
Bha cus chòcairean na ceann,
Leudaich, dh'àrdaich, dhruid is ghròb iad
A' chruach mhònach bun-os-cionn.

Beannachd aig na bodaich chòir ud
Rinn an tòrr gun dòigh gun tùr,
Murchadh, Ailean agus Tòmas,
'S gum bu fada beò an triùir.

Earail bheag a-nis 's a' chrìoch dhuibh,
Los gun dhìochuimhnich mi tòrr,
Faicibh Màiri is Cairistìona,
Bheir iad sgeul dhuibh air a' chòrr.