Â鶹Éç

"Ni fedraf gredu heddiw fy mod yn byw yng nghanol tref brysur ond gartrefol Aberystwyth. Fe'm ganwyd a'n magwyd yn ferch fferm "Alltgoch" nepell o Graig Twrch ger pentref bach Ffaldybrenin yn Sir Gaerfyrddin.

"Merch y Mynydd" oedd fy ffugenw yn yr eisteddfodau, ond heddiw buaswn yn ddigon hapus i gael fy ngalw yn ferch y môr. Daeth fy nghyswllt cyntaf â'r dŵr yn Ysgol Gyfun Llambed pan y cefais gyfle i ddysgu canwio a chael mynd allan ar y môr yn Llangrannog, a phan fydd Ioan ac Aled ychydig yn hŷn gobeithiaf y bydd modd i ni fel teulu ganwio unwaith eto.

Roedd Llansteffan yn fy nenu yn fawr tra'r oeddwn yn y Coleg yng Nghaerfyrddin, ond mae rhywbeth arbennig am Aberystwyth.

Mae'r môr a'r mynydd yn gyfochrog ac un o'n hoff deithiau ydyw cerdded i fyny Consti a thaith yr arfordir draw i Clarach, lle ar ddiwrnod braf byddwn yn cyfarfod gyda dwsinau o bobl eraill - ymwelwyr yn aml sy'n carafanio ac sy'n dotio at y daith ac yn barod iawn i gael sgwrs.

Naw mlynedd yn ôl pan symudais i Aberystwyth, Trefechan oedd fy nghartref, gyda'r afon yn llifo gerllaw a'r elyrch enfawr yn osgeiddig ar eu taith.

Yna symud i Ffordd y Gogledd gyda Richard yn 2001. Mae yna gyfeillgarwch hyfryd yn perthyn i'r stryd a chymdogion yn gymwynaswyr a'r plant yn cael y cyfle i dyfu i fyny gyda theulu estynedig sy'n ffrindiau - am brofiad hyfyd.

Mae'r dref yn le diogel, y prom a'r arddangosfa o adar eira yn hedfan yn ysblennydd a'r harbwr yn atyniad arbennig. Ceir cyfleon i feicio, ailgylchu, cymdeithasu ac mae'r parciau plant yn leoedd cyfeillgar ac ar y tair ffordd allan o'r dre ceir atyniadau arbennig sef y twyni yn Ynys Las, y Barcutiaid yn Nant yr Arian a Fferm Ffantasi, maent oll yn leoliadau arbennig.

Rwy'n ffodus fod fy lleoliad gwaith sef Canolfan Genedlaethol Merched y Wawr hefyd mewn llecyn hyfryd ger y Castell, ac yn adeilad cymdeithasol iawn.

Pwy all beidio a rhyfeddu at fywyd gwyllt y môr gyda'r wawr a'r machlud bythgofiadwy sy'n well nag unrhyw draeth tramor ac oglau y gwymon hyfryd.

Pobl sy'n gwneud lle yn baradwys, a diolchaf am y cyfeillgarwch arbennig a gawn fel teulu yn Aberystwyth.

Ysgrifenwyd yr erthygl gan Tegwen Morris