|
"Ym mis Mawrth bydd cyfres newydd ar S4C sef Wynebau Newydd ac un o'r cyntaf bydd TOM, rhaglen â chyswllt cryf ag Aberystwyth. Cwmni a chynhyrchydd lleol, sef Catrin M S Davies o Unigryw; person camera o Aberystwyth yn wreiddiol - Aled Jenkins a'r llais cefndirol yw Lowri Steffan. A holl stori'r rhaglen yw olrhain hanes dyn ifanc a addysgwyd yn Nhalybont a Phenweddig - Tom Cairnes. Mae Tom erbyn hyn yn gweithio yn Sierra Leone yn helpu i godi'r wlad o'i statws fel un o'r tlotaf yn y byd. Mae brodorion y wlad wedi gweld pethau erchyll yn ystod y 10 mlynedd o ryfel cartref a rwygodd y wlad tan 2002. Yn y rhaglen cawn weld Tom yn tynnu ffermwyr at ei gilydd i godi reis ac i brynu offer ffermio. Cyn mynd i weithio i'r Cenhedloedd Unedig yn Sierra Leone roedd gan Tom fywyd braf iawn yn Efrog Newydd fel ymgynghorydd busnes ond trodd ei gefn ar hynny i gyd er mwyn gweithio mewn gwlad sy'n datblygu. Er ei fod yn Affrica, mae ei wreiddiau yng Nghymru yn bwysig iawn iddo ac roedd dysgu'r iaith frodorol yn un o'r pethau cyntaf iddo ei wneud oherwydd i'w rieni ddanfon ef a'i frawd i ysgolion lle ddysgon nhw'r Gymraeg.
Mae Tom yn gobeithio creu cysylltiad rhwng Aberystwyth a Freetown fel bod modd i ni helpu'r ddinas a'r wlad dlawd yma."
 |
Ìý
