|
Fe ddaeth y gystadleuaeth lawr i'r gêm olaf gyda'r Americanwr Hunter Mahan yn ildio gyda Graeme McDowell yn ennill o dri twll gyda thwll yn weddill. Roedd hynny yn ddigon i weld Ewrop yn sicrhau buddugoliaeth o 14.5 i 13.5 gan gipio'r Cwpan Ryder yn ôl o afael yr Unol Daleithiau. Ar ddechrau'r sesiwn olaf o 12 gêm senglau ddydd Llun ar y blaen o 9.5 i 6.5 yn erbyn Yr Unol Daleithiau yn Celtic Manor. Ond yr Unol Daleithiau enillodd ddwy gêm agoriadol y sesiwn olaf i leihau mantais yr Ewropeaid. Roedd Steve Stricker yn drech na Lee West wood o ddau dwll cyn i Dustin Johnson ysgubo Martin Kaymer o'r neilltu gyda buddugoliaeth o chwe twll. Tarodd Ewrop yn ôl pan enillodd Ian Poulter o bum twll yn erbyn Matt Kuchar a Luke Donald yn fuddugol o un twll yn erbyn Jim Furyk. Cyfartal oedd y gêm rhwng Rory McIlroy a Stewart Cink gyda'r timau yn derbyn hanner pwynt yr un. Roedd Jeff Overton yn fuddugol o dri twll yn erbyn Ross Fisher ond fe enillodd Miguel Angel Jimenez o bedair twll yn ebryn Bubba Watson. Ond roedd Tiger Woods wedi lleihau mantais Ewrop ymhellach wedi buddugoliaeth o bum twll yn erbyn Francesco Molinari. Ac roedd yr Americanwyr wedi dod o fewn pwynt i Ewrop gyda'r sgôr yn 13-12 wedi buddugoliaeth Phil Mickleson o bedair twll yn erbyn Peter Hanson. Cyfartal orffennodd y gêm rhwng Edoardo Molinari a Rickie Fowler gyda'r Americanwr yn hawlio tair pluen yn y tair twll olaf. Ac roedd y sgôr yn gyfartal 13.5 yr un wedi i Zach Johnson guro'r Gwyddel Padraig Harrington o dri thwll. Roedd hynny'n golygu bod tynged y Gwpan wedi dod lawr i'r twll olaf a'r gêm rhwng Graeme McDowell a Hunter Mahan ac y gŵr o Ogledd Iwerddon oedd i brofi'n arwr Ewrop. Bu'n rhaid ymestyn y cystadlu i bedwerydd diwrnod gyda'r glaw yn gorfodi chwarae ar ddydd Llun am y tro cyntaf erioed. Collwyd saith awr o chwarae oherwydd y glaw ddydd Gwener, a doedd dim modd dechrau ddydd Sul tan 1.30pm wedi mwy o gawodydd trwm. Bu'n ddiwrnod cofiadwy i Ewrop ddydd Sul wrth i dîm Colin Montgomerie gasglu 5.5 pwynt allan o'r chwech oedd ar gael.
 |
Ìý