 |
|
 |
Gall dechrau ysgol fod yn adeg bryderus yn enwedig i rieni. Mae angen i chi baratoi eich hun a'ch plentyn ar gyfer y profiad. Cyn iddyn nhw ddechrau: Sgiliau cymdeithasol
Cyn dechrau yn yr ysgol, ac mewn da bryd cyn hynny os yn bosib, rhowch hwb i'ch plentyn drwy ei annog i ddatblygu sgiliau cymdeithasol da - y sgiliau hyn yw'r allwedd i wneud ffrindiau yn yr ysgol a'u cadw. - rhowch ddigonedd o gyfleoedd iddynt gymysgu â phlant eraill (mynychu grwpiau mam a'i phlentyn, grwpiau chwarae, chwarae meddal ac yn y blaen)
- anogwch eich plant i rannu a chymryd tro
- rhowch ffiniau pendant iddynt i ddangos ymddygiad derbyniol. Mae'n rhaid iddynt ddysgu bod "Na" yn golygu "Na"!
- anogwch hwy i gadw teganau ar ddiwedd gweithgaredd.
Sgiliau ymarferol
Cyn iddynt fynd i'r ysgol, dylai plant:
- fod yn hyderus ynghylch mynd i'r toiled ar eu pennau eu hunain.
- allu golchi a sychu eu dwylo eu hunain.
- allu ceisio gwisgo ar eu pennau eu hunain, a gallu gwisgo a chau eu cotiau eu hunain.
Paratoi ar gyfer yr ysgol
Paratowch blant ar gyfer eu bywyd newydd yn yr ysgol:
- ceisiwch eu cael i'r arferiad o dreulio cyfnodau byr heboch chi. Gofynnwch i ffrind neu aelod o'r teulu ofalu amdanynt tra byddwch chi'n mwynhau ychydig o amser ar eich pen eich hun!
- siaradwch gyda hwy am fynd i'r ysgol. Ewch am dro heibio'r ysgol, ar droed neu yn y car, cyn amled ag y gallwch.
- holwch beth yw enw athro/athrawes eich plentyn er mwyn i'r plentyn allu adnabod yr enw
- derbyniwch unrhyw wahoddiadau i ymweld â'r ysgol. Bydd y rhan fwyaf o ysgolion yn trefnu amser i chi a'ch plentyn ymweld a threulio amser yn y dosbarth cyn iddo ddechrau yn yr ysgol.
Ar y diwrnod:
ymddiriedwch yn y staff! Os yw'ch plentyn yn dal ei afael ynoch, gadewch i'r staff ddweud wrthych pa bryd i adael, pa mor anodd bynnag yw hi ac ewch oddi yno â gwên ar eich wyneb!
dewch i gasglu'ch plentyn yn brydlon - does dim byd gwaeth i blentyn ifanc na chael ei adael ar ôl yn aros pan fo pawb arall wedi mynd adre. |
|
|
 |
|
|
|
|
