Â鶹Éç

Mar a thug an togail a fhuair e buaidh air a sgrìobhadh

Mar a tha thu ag èirigh suas tha thu a' smaoineachadh, dè th' annam-sa ach mac croiteir. Dè th' ann an croitearachd ach dòigh beatha gu math cumanta. Chan eil càil àraid mu dheidhinn leithid de dhòigh beatha. Uill, bha m' athair aig muir 's chaochail e nuair a bha mise gu math òg, ach a bheil fios agad, maraireachd is croiteareachd, cha robh mi a' faicinn càil neo-àbhaisteach mun dheidhinn. Ach thòisich mi an uair sin a' smaointinn mu na daoine is rud eile air an robh mi mothachail, bha an dòigh beatha a' dol à bith. Bha mi a' faicinn gu robh an cànan a' sìor chrìonadh, bha na daoine a' sìor fàs seann, bha na daoine òga mar mi fhèin is a h-uile duine eile a' togail orra air falbh.

Tha cuimhne agam criomag bheag de bhàrdachd a rinn mi nach deach a-riamh dhan leabhar ach bha na faclan, 'Born with the shell of exile on their backs'. Bhon àm a rugadh tu, tha thu gu bhith deasachadh airson falbh co-dhiù dhan oilthigh, nursaigeadh, dha na poileis, saorsanachd. Bha a' mhòr-chuid de na daoine às na h-eileanan, bha iad a' togail orra a dh'àitichean eile agus thug sin mar gum biodh cuspairean dhomh. Agus thòisich mi a' sgrìobhadh mu na daoine a b' aithne dhomh, na daoine air an robh cuimhne agam, cuid de na dàin mu dheidhinn daoine a b' aithne dhomh ged a dh'atharraich mi an ainm no dh'atharraich mi an cruth, is cuid eile mu dheidhinn daoine a dh'fhaodadh a bhith coltach ris an fheadhainn a b'aithne dhomh. Mar a tha duine a' sgrìobhadh nobhail, tha thu gu math tric a' dol an sàs ann an rudan air a bheil thu eòlach ach gu bheil thu a' cur cruth eile oirre.