Â鶹Éç

Iomagain

21mh Cèitean 2008, Gerald

Chan eil mi cinnteach an tuirt mi, ach tha mi-fhìn agus Maria a' dèanamh obair an ²õ³Ù¾±Ã¹¾±°ù¾±³¦³ó±ð eadarainn fhad 's a tha sinn an seo. Tha sinn gu bhith a' stiùireadh dà phrògraim an duine. Thuige seo 's e GVs a tha mi-fhìn agus an sgioba air a bhith a' filmeadh ach rinn Maria film slàn (am fear mu leighisean Sìonach anns a bheil an dotair). Tha i a-nis ag ullachadh airson an ath fhear a dhèanamh. Mar sin 's e an cothrom agamsa a bh' ann an-diugh agus 's mi bha iomagaineach.

Chan eil mi ùr san dreuchd ach chan eil sin gu diofar – tha mi an-còmhnaidh iomagaineach mus tòisich sinn a' filmeadh. Gu fortanach, bha mi cho sgìth agus nach do chùm sin nam dhùisg mi a-raoir. Ged a bha uallach orm sa mhadainn, cha chreid mi gun aithneachadh duine sin orm (is dòcha gu bheil beachd eile aig Maria, ged-tà!). Bidh mi dìreach a' fàs sàmhach nuair a bhios cus air m' inntinn.

Co-dhiù, cha robh cus tìde agam airson smaoineachadh mu dheidhinn oir, nuair a ràinig sinn an àite, bha na daoine a bha dùil againn fhilmeadh air an cuid obair-là a thòiseachadh. Mar sin mach leinn agus "Action!". (No "KaiPai" mar a chanas iad an seo).

Goirid as dèidh dhuinn tòiseachadh, dh' fhàs mi na bu chofhurtail. Mar a bha sinn a' dol air adhart, bha Dave agus JP a' tuigsinn dè dìreach a bha mi ag iarraidh, fiù 's mus innsinn dhaibh. Siud aon de na rudan math mu dheidhinn a bhith ag obair leis an aon sgioba airson greis – fàsaidh gach h-aon agaibh cleachdte ri dòighean smaoineachaidh agus stoidhle-obrach an fheadhainn eile (uaireannan 's e droch rud a tha sin!). Bha e math gu robh Maria an làthair cuideachd, oir b' urrainn dhuinn bruidhinn mu ar diofar bheachdan. Cuideachd, tha e a' ciallachadh gum bi an aon seòrsa coltais air na filmichean gu lèir.

Aig deireadh an là, bha mi cho sgìth ris a' chù ach air mo dhòigh glan leis mar a chaidh dhuinn. Tha obair JP a' coimhead sgoinneil. Saoilidh mi gun còrd e ribh.